Estamos rodeados de mitos en torno á alimentación que moitas veces rexen as nosas pautas alimentarias. Por iso formulamos este artigo (segundo dunha serie), onde imos ir desmentindo un a un os máis populares.
Comezamos agora a desmentir un a un estes falsos mitos alimentarios.
Mito: O ovo escuro alimenta máis que o branco
O ovo moreno non posúe ningunha vantaxe nutricional fronte ao branco. A súa cor vén dada pola raza da galiña e non pola súa achega en distintos compoñentes. Tanto os ovos morenos coma os brancos son unha fonte importante de nutrientes para todas as idades.
Mito: O ovo frito é un prato prohibido
Todo o contrario. É un dos alimentos con maior densidade de nutrientes de entre os que habitualmente consumimos. As súas proteínas presentan un perfil de aminoácidos esenciais (véxase Nutrición)similar ao que se considera ideal para o home. Por esta razón, dise que é de alto valor biolóxico. Ademais de que o seu perfil graxo é moi axeitado, é fonte importante de vitaminas e minerais. Recorda usar sempre aceite de oliva virxe para fritir. Como o ovo non contén hidratos de carbono, o pan para "mollar" constitúe un complemento perfecto. Un ovo frito: 174 Kcal.
Mito: O colesterol é malo para a saúde
O colesterol é unha substancia graxa natural presente en todas as células do corpo humano necesaria para o normal funcionamento do organismo (véxase Graxa e enfermidade cardiovascular). No pasado críase que o colesterol que provén da dieta era o principal responsable do aumento do colesterol plasmático, pero hoxe coñécese que son as graxas saturadas e trans as principais responsables do dano vascular e que o colesterol dietético ten un papel menor. O ovo, como os alimentos de orixe animal, ten colesterol entre os seus compoñentes, pero tamén achega fosfolípidos, graxas insaturadas, vitaminas e antioxidantes. É por isto polo que o seu consumo non supón ningún risco en persoas sas.
Mito: O ovo cru "alimenta máis que o cocido"
O ovo sempre debe cociñarse ata que a clara estea coagulada. Se se consume cru, moitos dos seus compoñentes non se aproveitan. Coa calor, ademais de facilitar a liberación dalgunhas vitaminas tamén se destrúen microorganismos como a salmonella. Neste punto recorda que un proceso de quentamento axeitado a temperatura de 70 ºC en todo o alimento, garante a eliminación da salmonella.
Mito: Calquera froita engorda se se toma despois de comer
É igual tomar froita se se toma antes durante ou despois da comida. A súa achega calorífica non varía. Non obstante, se a tomamos antes de comer, pode inducir certa sensación de saciedade e facer que durante a comida comamos menos.
Mito: Comer só froita durante un día enteiro adelgaza
A froita achega poucas calorías. Nun día non vas solucionar ningún problema de peso. Non obstante, fíxate no exemplo que che poñemos:
Na seguinte táboa aparece todo o que comeu Pilar ao longo do día.
No seguinte gráfico cada barra azul representa un nutriente (% AP/IR é a porcentaxe de aporte respecto á inxesta recomendada dese nutriente). Canto máis se achegan á barra verde vertical, máis se cobren as necesidades diarias para cada nutriente a través do menú. Como podes comprobar, agás para a vitamina C, o menú de Pilar quédase "curto" en case todo.
Se Pilar mantivese este menú no tempo aínda que fose de forma alternativa podería ocasionarlle problemas de saúde. Por iso é mellor tomar alimentos de todos os grupos na cantidade axeitada para manter ou baixar o peso. E non se che esqueza a actividade física diaria.
Tomar froita variada (polo menos 3 porcións ao día) forma parte dunha dieta saudable pero non é suficiente para conseguir unha axeitada nutrición. Para baixar peso segue os consellos de O exceso de peso e a obesidade.
Mito: Se a auga se toma durante a comida, engorda
Achega Calorífica da auga: 0. A auga non proporciona calorías, e como se tratou no artigo da auga é conveniente beber con frecuencia. Por outra parte, é indiferente o momento en que se tome, e se é durante a comida ou entre horas.
Publicacións relacionadas que poden interesarte: