Tanto o melón como a sandía son dúas froitas que poden ser moi beneficiosas para a nosa saúde, ademais poden consumirse de diversas formas: en batidos, zumes, xeados ou con outras froitas. Apórtannos vitaminas e teñen un alto contido en auga. A continuación darémosche una serie de razóns para que coñezas as súas propiedades e non deixes de incluílas na túa dieta.
O melón contén unha alta cantidade de auga e unha cantidade de azucre inferior ao de outras froitas; feito que, unido a que apenas contén graxa, fai do melón unha das froitas con menor contido calórico.
É rico en minerais como potasio e magnesio. Aporta unha gran cantidade de vitamina C e xunto á laranxa, é unha das froitas con maior contido en ácido fólico (vitamina B9).
É de destacar tamén o seu contido en ß-caroteno que no noso organismo se transforma en vitamina A. Esta vitamina é esencial para a visión, o bo estado da pel, o cabelo, as mucosas, os ósos e para o correcto funcionamento do sistema inmunolóxico. A riqueza nestes carotenos increméntase nas variedades de melóns de polpa máis alaranxada.
En canto a sandía, o máis destacable na súa composición é o seu contido en licopeno. Este composto está asociado coa diminución do risco de enfermidade cardiovascular e coa protección fronte algúns tipos de cáncer.
En ambas froitas, o alto contido de auga estimula os riles para que funcionen con máis eficiencia, facilitando a eliminación de sustancias de desfeito e toxinas, e mellorando a función renal. Tamén están indicadas en estados de deshidratación acompañados de perdas de minerais (diarreas, suores abundantes e crises febrís).
A nosa suxestión: catro receitas con melón e sandía.
Lembra!
- Consume 3 ou máis froitas ao día.
- Toma froitas variadas e con distintas cores para garantir así un aporte nutritivo axeitado.
- Procura tomar sempre froitas de tempada.