A carie dental é unha das enfermidades máis frecuentes nos países industrializados, sendo a responsable da maior parte da perda das pezas dentais. Na orixe da carie teñen un papel importante a alimentación, a hixiene e a resistencia do dente. Para a prevención da carie aconséllase actuar simultaneamente na modificación da dieta por unha menos carioxénica, na realización dunha correcta hixiene bucodental, no aumento da resistencia do esmalte dental mediante a administración de flúor e visitando periodicamente ao/á dentista.
Para manter con boa saúde os dentes faise imprescindible ter unha dieta equilibrada que garanta o aporte axeitado de todos os nutrientes necesarios: hidratos de carbono, proteínas, graxas, vitaminas, minerais e auga. Unha dieta pouco equilibrada na que se abusa de alimentos ricos en azucres (caramelos, chocolates, xeados, refrescos, doces de todo tipo, etc.), coñécese como dieta carioxénica ou produtora de carie.
Para ter unha boa dentadura, os mellores alimentos son aqueles ricos en proteínas e vitaminas (peixes, carnes, froitas,...) e os que aportan calcio e outros minerais (leite, queixo, iogur). O aporte de hidratos de carbono débese facer consumindo alimentos ricos en fibra, tales como verduras, cereais e froitas, e non aqueles ricos en azucres e fariñas refinadas.
O cepillado da dentadura con pasta dentífrica con flúor ten demostrado ser moi eficaz na prevención da carie, xa que o seu uso aumenta a resistencia do esmalte dental. O fío dental é outro instrumento complementario que pode ser empregado na eliminación da placa nos espazos interdentais. O ideal sería cepillarse despois de cada toma de alimento, preferiblemente despois do almorzo, do xantar e da cea.
Para aumentar a resistencia do esmalte dental, emprégase o flúor. Entre os métodos de aporte de flúor, contémplanse as enxaugaduras bucais, a utilización diaria de pasta dentífrica con flúor ou as aplicacións locais realizadas por profesionais.
Visitar periodicamente aos profesionais da saúde bucodental é unha medida preventiva moi eficaz, xa que permite a detección precoz da carie, podendo atallala coa aplicación de flúor mediante vernices e pastas con flúor en zonas afectadas.