Moitos son os estudos científicos que demostran que os bebés aleitados teñen un mellor estado de saúde e menor risco de padecer enfermidades. O desonvolvemento neurolóxico mellora e o vínculo coas súas nais vese facilitado, grazas á acción das hormonas relacionadas coa lactación e a un maior contacto físico e visual.
O inicio da lactación materna debe ser o máis pronto posible; para favorecela, recoméndase o contacto pel con pel inmediatamente despois do nacemento. Cando nacen, os bebés están espertos pero tranquilos se están pegadiños á súa nai. É o chamado período sensitivo, no que bebé e nai se recoñecen mutuamente polo olor, tacto, vista, oído... Tamén é o momento ideal para que fagan a primeira toma. A lactación deberá continuar sen restrición ningunha a partir do nacemento, seguindo os sinais de demanda do bebé.
Cando queren mamar, os bebés comezan a revolverse, buscan coas meixelas, cabecean, fan ruidiños ou chupan as mans; é o momento de poñelos a mamar. Se están tranquilos, ou incluso algo adurmiñados, serán capaces de mamar mellor. Non convén esperar a que o bebé chore para ofrecerlle o peito. O pranto é un sinal tardío de fame e o bebé estará máis nervioso e será máis complicado aleitalo.
Os primeiros días o peito produce o chamado costro, que se produce en pequenas cantidades pero cun enorme valor nutritivo e inmunolóxico, sendo unha verdadeira fonte de saúde e protección para os máis pequenos.
Os propios bebés decidirán canto tempo precisan mamar e con que frecuencia, é esta a esencia da lactación: A demanda.
Ao principio as tomas son frecuentes e longas xa que, para mamar, o bebé ten que coordinar a succión con respirar e tragar e iso require certo adestramento. Ademais, o leite materno dixírese máis facilmente que os leites de fórmula, e o estómago do bebé ten unha capacidade pequena (uns 60 ml ás 3 semanas) polo que necesitan mamar frecuentemente.
As tomas non deben ser regulares; haberá momentos do día nos cales o bebé pida máis a miúdo (xeralmente pola noite) e outros en que descansen máis. O importante é que fagan arredor de 8 a 12 tomas ao longo do día, e pode que incluso máis.
Ter os bebés no colo é unha boa maneira de detectar os primeiros sinais de fame e, polo tanto, de saber cando é un bo momento para ofrecerlles o peito.
Hai que ter en conta que os bebés non só piden o peito por fame, senón tamén para relaxarse. É a chamada succión non nutritiva, que resulta tamén moi importante como adestramento e estimulación da produción do leite.
Estes primeiros días é moi importante non ofrecer chupetas nin biberóns para non limitar o acceso ao peito, xa que a produción de leite depende da succión e demanda do lactante. Ademais, a succión das mamadeiras é diferente á do peito polo que poderían dificultar o establecemento da lactación materna. A maior succión, maior es- tímulo e maior produción de leite.
Consellos para un bo aleitamento:
Busca un ambiente tranquilo e relaxado.
Adopta unha postura que che resulte cómoda a ti e o teu bebé. Coñecer e aplicar diferentes posturas pode axudar a aliviar molestias nalgún momento.
O corpo do bebé deberá estar aliñado, sen forzar a postura do pescozo, e en estreito contacto coa nai. De ter que agarralo é mellor sostelo polos ombreiros e deixar a cabeza libre para que a poida mover.
O mellor sinal de que o bebé está a mamar correctamente é que o peito non doe, séntes o bebé facer succións profundas movendo o queixo coa meixela chea, e mesmo se sente como traga.
É recomendable que a matrona ou o pediatra revisen o bebé aos tres ou catro días do nacemento para verificar que a perda de peso non é excesiva e que todo vai ben.
Observa a ouriña e as deposicións do bebé; as primeiras deposicións son negras, pastosas e pegañentas, e chámanse meconio. Aos tres días pasan a ser máis verdosas e líquidas, ata que aparecen as típicas deposicións amarelentas. Nos aleitados adoitan ser máis líquidas e case sempre aparecen tras as tomas.
Quen mellor extrae o leite e regula o establecemento da lactación materna é o bebé; ofrecerlle de mamar cada pouco e sen límite de duración das tomas, reducirá os problemas de ingurxitacións e posibles mastites.
Ten confianza na túa capacidade natural para aleitar.