O leite é fonte de calcio, minerais e vitaminas. O leite e os seus derivados son un alimento importante na dieta mediterránea e recoméndase o seu consumo diario polos múltiples beneficios que proporciona ao noso organismo.
O leite e os seus derivados destacan polo seu elevado contido de proteínas de alto valor biolóxico e ser fonte de calcio, minerais e vitaminas. O calcio é imprescindible para o crecemento e desenvolvemento do esqueleto nos primeiros anos, gozar dun esqueleto saudable ao longo da nosa vida e alcanzar unha maior densidade mineral ósea na idade avanzada. Os lácteos son de consumo diario na dieta mediterránea.
Os seus beneficios son resultado da interacción de todos os seus nutrientes, indo máis alá da suma de efectos individuais. Na actualidade estanse a investigar novos beneficios en relación cos péptidos bioactivos do leite, como o seu posible efecto hipotensor e propiedades antimicrobianas.
8 aspectos que deberías saber sobre o leite
- A graxa do leite ten un papel protector fronte ao cancro de colon. As últimas investigacións sobre a graxa láctea indican unha baixa tendencia a acumularse no tecido adiposo.
- As vitaminas liposolubles do leite encóntranse na graxa. Se tomas leite desnatado, elixe aquelas opcións que incorporan as vitaminas que se perden na eliminación da graxa, especialmente a vitamina D, presente en grandes cantidades en moi poucos alimentos.
- Recoméndase o leite enteiro aos nenos e adolescentes para aproveitar todas as vitaminas da graxa do leite.
- Pola mesma razón se recomenda o leite enteiro aos adultos, se non hai patoloxías que o contraindiquen e sempre e cando se siga unha dieta saudable.
- Con frecuencia recoméndase que os adultos consuman iogur e queixo desnatados polo seu menor contido calorífico, ácidos graxos saturados e colesterol. Os produtos lácteos desnatados están indicados especialmente para persoas con sobrepeso, obesidade e problemas cardiovasculares.
- A clasificación de leite enteiro, semidesnatado e desnatado só fai referencia á presenza de graxa. Se es intolerante á lactosa, debes consumir leite sen lactosa. No mercado encóntrase leite sen lactosa enteiro, semidesnatado e desnatado.
- O organismo absorbe mellor o calcio do leite, queixo e iogur que o doutros alimentos grazas á caseína e a lactosa.
- Tomar un iogur favorece a absorción do ferro presente noutros alimentos. O noso organismo necesita de certos compoñentes para asimilar o ferro que inxerimos nos legumes, por exemplo. Acompañar o menú con pementos, mandarinas ou un iogur axudará á súa absorción.
Consumo axeitado de leite e derivados
A Federación Española de Sociedades de Nutrición, Alimentación e Dietética (FESNAD) recomenda para cada grupo de poboación consumir leite, queixo e iogur nas seguintes cantidades:
- Nenos: 2-3 racións diarias
- Adolescentes: 3-4 racións diarias
- Adultos: 2-3 racións diarias
- Mulleres embarazadas, en lactación ou durante a menopausa: 3-4 racións diarias
- Anciáns: 2-4 racións diarias
Nos últimos anos reduciuse o consumo de leite e derivados. Isto débese ao incremento do consumo das bebidas azucradas, que substitúen ao vaso de leite, e a que cada vez é máis frecuente saltarse o almorzo.