... o noso corpo está deseñado para moverse, pero a vida sedentaria que levamos non é coherente con este propósito? Descubre 18 razóns polas que integrar a actividade física regular na túa vida diaria para vivir máis e mellor.
1. O corpo humano está deseñado para moverse.
2. O exercicio físico serve para previr, tratar e rehabilitar enfermidades, ademais de aumentar a calidade de vida de todos os que o practicamos con regularidade.
3. O movemento corporal foi durante miles de anos a principal ferramenta que permitiu aos nosos antepasados buscar alimento, defenderse dos depredadores, desprazarse a novos territorios... Na actualidade, a nosa confortable forma de vida é tan sedentaria que xa non é coherente co deseño corporal.
4. O noso corpo necesita practicar actividade física de forma regular para alcanzar un axeitado crecemento e desenvolvemento e para envellecer con saúde.
5. A falta de actividade física é a causa principal de preto do 25% dos casos de cancro de mama e de colon, do 27% dos casos de diabete e de arredor do 30% das cardiopatías isquémicas, segundo a Organización Mundial da Saúde.
6. A actividade física é a única actividade voluntaria que nos permite reducir a graxa corporal, tanto a total coma a localizada. Pode reducir o exceso de graxa abdominal, o que está directamente relacionado coas enfermidades cardiovasculares.
7. En certas situacións, o exercicio físico pode ter mellores resultados que algúns medicamentos e evítanos outros efectos secundarios.
8. Cando unha persoa sedentaria pasa a ser minimamente activa, obtén a maior parte dos beneficios da actividade física.
9. A actividade física contribúe á prevención e o control da presión arterial, importante factor de risco para enfermidades cerebro e cardiovasculares.
10. As persoas fisicamente activas melloran a súa autoestima e preveñen e melloran os trastornos depresivos e de ansiedade.
11. Podemos mellorar a calidade do sono ao realizar actividade física.
12. A actividade física contribúe a previr a obesidade, tanto en nenos coma en adultos, ao reducir o peso corporal graxo e mantelo en niveis saudables.
13. Na poboación infantil, a actividade física favorece un mellor rendemento cognitivo.
14. Un estilo de vida activo favorece a socialización dos nenos e nenas e, na idade adulta, propicia e mantén as relacións sociais.
15. Un neno activo ten maior probabilidade de ser un adulto activo.
16. As contraccións musculares e as vibracións articulares que se producen ao realizar diferentes actividades físicas favorecen que os ósos se manteñan fortes e sans.
17. Un estilo de vida fisicamente activo mellora a función cognitiva e asóciase cun menor risco de deterioración cognitiva e de demencia.
18. As persoas de maior idade que participan nalgunha modalidade de actividade física reducen substancialmente o risco de caídas con importantes lesións e graves consecuencias.