En Xente con Vida queremos que gocedes dunha alimentación saudable durante todo o ano. No verán, é particularmente importante seguir unha serie de consellos para manter unha axeitada hidratación, adaptar a inxestión ás necesidades caloríficas e coidar a forma de conservación e preparación de alimentos para previr certas intoxicacións alimentarias máis frecuentes nesta época do ano.
En Xente con Vida queremos que gocedes dunha alimentación saudable durante todo o ano. É importante coidar a dieta en todas as estacións do ano pero no verán as altas temperaturas, o cambio de hábitos e as vacacións poden influír negativamente na calidade da nosa dieta.
O verán é tempo de froitas, de hortalizas, de ensaladas, de sobremesas frescas e de batidos. Os produtos de tempada poden ser uns grandes aliados á hora de preparar os nosos menús estivais. Cociñar cos ingredientes que nos ofrecen a horta e o mar en cada estación do ano non é só máis san, senón tamén o máis rico, barato e sostible.
Con respecto ás froitas, ademais da riqueza en nutrientes como vitaminas (como o folato, vitamina C ou vitamina A) e compostos "bioactivos" (fitoquímicos, substancias presentes nos vexetais que nos achegan moitos efectos beneficiosos) destacan pola súa capacidade para axudarnos a manter unha axeitada hidratación.
A sandía ou o melón (arredor do 90% é auga) son bos exemplos e deben estar habitualmente presentes en sobremesas, macedonias e batidos de froita natural particularmente nas persoas de idade avanzada ás que lles "custa" traballo manter unha inxestión de auga axeitada. Ademais, a súa baixa densidade calorífica fainas moi axeitadas para esta época do ano. As froitas conteñen poucos minerais, salvo o potasio que aparece en cantidades moderadas e que xunto co seu baixo contido en sodio, as converte en alimentos indicados especialmente para persoas con hipertensión ou que sigan un tratamento con laxantes e diuréticos.
Por outra parte, a fibra que conteñen de forma natural os cereais, os legumes, as froitas e as hortalizas proporciona moitos efectos beneficiosos no organismo. As pectinas das froitas están incluídas dentro da denominada fibra soluble, polo que ademais dos seus efectos locais no colon, se describiron outros como a capacidade para previr a aparición de distintas enfermidades como a diabete, a obesidade ou as enfermidades cardiovasculares.
Con respecto ás froitas de verán, sabías que...
- A ameixa é unha das froitas con máis capacidade antioxidante (xunto coas cereixas, a mazá, os amorodos ou as peras, entre outras)?
- O melocotón, que achega un contido moderado de vitamina C, provitamina A e fibra soluble e insoluble, contén ademais cantidades elevadas de luteína e zeaxantina, pigmentos relacionados coa saúde ocular?
- A pera ten acción astrinxente e anitinflamatoria e polo tanto está indicada nalgúns trastornos dixestivos como diarreas?
Dentro da hortalizas e legumes, algunhas son moi axeitadas para preparar na época estival, e en particular todas as que podemos preparar en cru, polo que se preservan mellor os seus nutrientes. Neste caso, é necesario adquirilas moi frescas (xa que a medida que pasan os días se perden nutrientes), lavalas ben, aínda se se van pelar xa que poden aloxar na súa pel certos contaminantes ou produtos nocivos de uso fitosanitario e toralas xusto antes de consumir para preservar todas as súas calidades nutritivas.
Con respecto ás hortalizas do verán, sabías que...
- O tomate é un alimento moi habitual na nosa dieta, ao que se lle atribúen calidades diuréticas e laxantes. De baixa achega calorífica, é rico en carotenoides como o licopeno, ao que se lle relacionou como un factor protector fronte ao cancro de próstata.
- 100 gr de feixóns ao día poden cubrir as necesidades de ácido fólico, vitamina do grupo B implicada na saúde vascular e na prevención de certas anomalías conxénitas como os defectos no tubo neural. Na última enquisa sobre a dieta que seguían os galegos, a inxestión desta vitamina estaba por debaixo dos valores recomendados. Ademais, nestes vexetais destaca a súa baixa achega calorífica, o seu contido en auga e en fibra dietética.
A nosa proposta
Agora tócavos usar a imaxinación para combinar estes alimentos de tempada e configurar os vosos menús. Para axudarvos imos propoñer un menú sinxelo e saudable, para todos os membros da familia!
Aproveita o verán e as vacacións para comer cos teus e sen présas. Bo proveito!
Menú estival
¿Cómo elaborar estes pratos?
Feixóns verdes con tomate:
- Cocede ao vapor ou en poquita auga os feixóns verdes, cortadas o menos posible, para preservar todos os nutrientes.
- Mentres tanto, facede un rustrido con allos tenros e tomate natural e incorporádeo a feixóns unha vez feitos.
Xoubiñas fritas:
- Limpade as xoubas e sacádelles a cabeza.
- De xeito opcional, podédelas aliñar con ourego e perexil.
- Enfariñade e fritide en abundante aceite. Poñédeas en papel absorbente para retirar o máximo aceite posible.
Flan de arroz:
- Cocede o arroz, deixádeo arrefriar e formade pequenos flans.
- De xeito opcional, podedes aromatizalo con herbas aromáticas.
- Servide as parrochas acompañadas do flan de arroz.
Sorbete de sandía con limón e menta:
- Coa sandía moi fría e un pouquiño de zume de limón facede un batido, aliñádeo con menta e servídeo.
Recomendación de Xente con Vida
Aínda que as espiñas das sardiñas poden inxerirse sen problemas, non as recomendamos para os máis pequenos da casa. Podedes sacarlles a espiña, rebozalas en fariña e ovo, e fritilas, unidas pola cola, formando un abano.