Estamos rodeados de mitos en torno á alimentación que moitas veces rexen as nosas pautas alimenticias. Por iso formulamos este artigo (primeiro dunha serie), onde imos ir desmentindo un a un os máis populares.
Comezamos agora a desmentir un a un estes falsos mitos alimentarios.
Mito: O chocolate é unha lambetada moi perxudicial que debemos excluír da nosa alimentación
É verdade que o chocolate proporciona moitas calorías polo seu elevado contido en graxas e azucres (aínda que o seu contido varía un pouco dependendo da súa variedade: chocolate con leite, puro, con froitos secos (desde 500Kcal/100g do que ten máis contido en cacao ata 550 Kcal/100g para o de leite e améndoas. Aporte calórico de 2 onzas de chocolate puro: ±280kcal).
Sen embargo, ademais de calorías, tamén proporciona moitos efectos beneficiosos. O chocolate é rico en flavonoides, compostos naturais que se atopan en abundancia en moitos alimentos de orixe vexetal con actividade antioxidante fronte ás enfermidades dexenerativas e aos procesos de envellecemento.
Tamén se cre que os flavonoides do cacao teñen un efecto protector da saúde cardiovascular. Na actualidade, algúns pobos indíxenas de América Central e do Sur seguen utilizando distintas partes da árbore do cacao para preparar as súas medicinas tradicionais.
Non é certo que debamos excluír ao chocolate da nosa dieta. Sí limitar o seu consumo polo seu elevado aporte calórico.
Mito: Só o café contén cafeína
As bebidas "enerxizantes" conteñen tamén cafeína e ás veces, dependendo da marca, en cantidades superiores a unha cunca de café "só" ou a unha bebida de cola. Ademais engádenlles outros compoñentes con efectos estimulantes similares á cafeína. ¿Daríaslle ao teu fillo pequeno unha cunca de café "puro"?.
Mito: O pan engorda
O pan proporciona menos da metade de kilocalorías que as graxas e menos que algúns alimentos do mesmo grupo. Por exemplo a diferenza calórica de almorzar con pan (260kcal/100g) ou facelo cun produto de bolería (350 a máis de 500kcal/100g) pode ser de máis do dobre.
Ao pan considéraselle un poderoso factor de equilibrio nutricional e incorpora sales minerais, fibra e vitaminas. Unha ración de pan: 40-60g..
Mito: É necesario tomar suplementos vitamínicos para cubrir as nosas necesidades
En condicións normais con bo estado de saúde non se aconsella tomar suplementos con vitaminas. Se comemos correctamente, xa inxerimos todas as vitaminas necesarias para a nosa saúde. Os últimos estudos confirman que os efectos beneficiosos das dietas saudables ricas en vitaminas e minerais son debidos á dieta no seu conxunto (posiblemente pola riqueza de compostos bioactivos, moitos por identificar) e non a nutrientes de forma "individual".
Ademais, moitas vitaminas teñen un "nivel máximo tolerable" por riba do cal os prexuízos son superiores aos beneficios.
Mito: Os alimentos transxénicos son moi malos
Antes de asegurar se son malos ou bos, é mellor que coñezas o que se entende por un alimento transxénico: Os alimentos transxénicos poden definirse como alimentos nos cales se modificou o material xenético para obter algún beneficio engadido. Con esta técnica permítense transferir xenes individuais (con algunha propiedade que nos interese) dun organismo a outro, tamén entre especies non relacionadas.
Segundo palabras de Daniel Ramón Vidal, experto no tema: "Coa enxeñería xenética, en lugar de mesturar xenes ao azar tomamos o xen que nos interesa e introducímolo no organismo desexado". Desta forma, é posible obter a combinación xenética adecuada de forma moito máis rápida que se contamos co azar.
O obxectivo inicial do desenvolvemento de vexetais sobre a base de organismos modificados xeneticamente (GM) foi aumentar a protección dos cultivos mediante a introdución de resistencia a enfermidades causadas por insectos ou virus ou unha maior tolerancia aos herbicidas. Os alimentos GM actualmente dispoñibles no mercado internacional pasaron as avaliacións de risco e non é probable que presenten riscos para a saúde humana.
Parece de ciencia-ficción pero xa son posibles patacas transxénicas que inmunizan contra o cólera ou diarreas bacterianas, ou unha variedade de arroz transxénico capaz de producir provitamina A. Tamén un grupo de científicos do Reino Unido, en Xapón e Alemaña, crearon uns tomates cun aporte tres veces superior ao habitual de ß-caroteno, substancia beneficiosa para a saúde.
Enlace á OMS: 20 preguntas sobre os alimentos xeneticamente modificados (GM)
Outras publicacións relacionadas do teu interese: