É saudable a merenda que lles preparas aos nenos? varías a súa
merenda frecuentemente? gozan coa merenda? Planificando con
antelación a merenda e apoiándote nuns consellos prácticos que che
propoñemos a continuación, lograrás que merenden san e saudable.
Segundo as recomendacións actuais, para a idade infantil e xuvenil
é desexable repartir a achega enerxética en 5 tomas ao longo do
día: almorzo, merenda a media mañá, comida, merenda a media tarde
e cea.
As dúas merendas do día deben ser comidas lixeiras, que non
supoñan máis do 10-15% do aporte total da enerxía diaria, polo que é
suficiente unha achega aproximada de 200-250 calorías para a idade
escolar, e de 150-200 en idade preescolar. Por isto, as merendas
deben ser pouco calóricas, variadas, á vez que saudables.
Suxestións para preparar merendas
infantís
Algúns consellos prácticos:
- Planifica con antelación os alimentos que o neno vai levar
á escola cada mañá e durante a semana. Desta forma a oferta será
mais equilibrada e variada.
- Coida e varía as merendas da tarde ofrecendo opcións
atractivas.
- Fai un repaso das froitas que o neno pode manipular
mellor. A variedade nas froitas é importante para o menú dos teus
fillos. Proba ademais da mandarina ou o plátano outras opcións como
bolsiñas con uvas, amorodos...Recorda que as distintas cores das
froitas (laranxa, vermello, branco, verde...) adoita estar en
relación con algunhas propiedades nutricionais específicas, por iso
é importante varialo a cotío.
- De vez en cando inclúe froitas deshidratadas, en menos cantidade cas frescas, como orellóns de albaricoque, ameixas e uvas pasas.
- Os froitos secos (noces, améndoas, cacahuetes, abelás,
pipas de xirasol) son mais calóricos sobre todo pola elevada
cantidade de graxa. Sen embargo, é destacable a calidade da mesma,
polo que son recomendables en cantidades adecuadas algunhas veces á
semana. Elixe os naturais que non levan sal nin coberturas
engadidas. Ten presente que a inxestión de froitos secos antes dos
cinco anos pode ter risco de atragoamento, especialmente os
cacahuetes e as pipas de xirasol.
- Intercambia as froitas con iogur líquido ou sólido ou
pequenos bocadillos de pan con queixo baixo en graxa (fresco ou tipo
Burgos).
-
Na merenda da tarde non sempre a oferta ten que ser un
bocadillo con embutido ou crema de cacao. Proba a intercalar outras
opcións como pan con aceite de oliva e tomate cru, froita con
iogur, zumes naturais con pan e froitos secos, pequenos bocadillos
con leituga, tomate, atún e ovo cocido en pequena cantidade, etc.
- Prefire o xamón (curado ou cocido) e o friame de pavo e
evita outros como salame, salchichón que polo
seu alto contido en graxas que poden ser prexudiciais.
- Evita pasteliños, doces, bolos industriais e cremas de
chocolate comerciais polo seu alto contido en graxas e azucres. Poden
incrementar notablemente o seu valor enerxético.
- A bebida de elección e sempre a auga. Evita o consumo de bebidas
refrescantes azucradas e/ou gasificadas (col?a, extractos), bebidas
enerxéticas e batidos comerciais.
- Coida os horarios aos que lles serves as merendas aos nenos.
Ten en conta que non deben interferir coas comidas principais e en
particular coa cea, que debe servirse cedo para iniciar o soño e
erguerse con tempo para facer un bo almorzo.
- Axuda aos/as adolescentes a facer eleccións saudables fóra
do fogar. Proponlles alternativas atractivas
Artigos do blog relacionados que poden interesarche: