A tradición, a historia e a riqueza gastronómica autóctona das rexións europeas bañadas polo Atlántico, entre elas Galicia, derivaron nun padrón lixeiramente distinto ao da dieta mediterránea, pero igual de saudable. Apúntaste aos seus beneficios?
- A dieta atlántica caracterízase polo abundante consumo de alimentos de tempada, frescos e locais.
- Destaca o importante consumo de peixe e de alimentos vexetais como cereais, patacas e legumes.
- O concepto de dieta atlántica non engloba só un tipo de dieta no sentido estrito da inxesta de nutrientes, senón unha forma de alimentación común caracterizada polo placer da comida compartida e as preparacións culinarias sinxelas, con grandes beneficios para a nosa saúde.
Galicia é unha das principais embaixadoras da dieta atlántica. As rexións do Arco Atlántico, aínda que poden presentar modelos alimentarios distintos, teñen en común dispoñer dunha amplia variedade de alimentos de gran calidade tanto da horta como do mar. A súa tradición e cultura gastronómicas derivaron nun padrón de alimentación similar ao da dieta mediterránea pero cunha serie de particularidades autóctonas. Sabes cales son as súas características?
- Abundancia de alimentos de temporada, locais, frescos e pouco procesados.
- Abundancia de alimentos procedentes de vexetais: verduras e hortalizas, froitas, cereais (pan con gran enteiro), patacas, castañas, noces e leguminosas.
- Abundante consumo de peixe e marisco frescos, conxelados ou en conserva.
- Consumo de leite e derivados lácteos, en especial queixos.
- Consumo de carne de porco, vacún, caza e aves.
- Consumo de viño, normalmente coas comidas, e en cantidades moderadas.
- Uso de aceite de oliva para aliñado e cociñado.
- Preparación culinaria preferente: cocción, guisado e brasa.
Benefíciate das recomendacións da dieta atlántica
Ao igual que a dieta mediterránea, a dieta atlántica non é só un padrón de alimentación. Estes oito consellos axudaranche a incorporar os beneficios da dieta atlántica, no marco dun estilo de vida saudable. Apúntate a eles!
1. Consumo de peixe (de mar e de río) e mariscos tres/catro veces á semana, pola súa achega en proteínas de alto valor biolóxico, ácidos graxos omega 3, vitamina D e calcio (peixe pequeno consumido enteiro ou peixe enlatado).
2. Consumo elevado de cereais, paracas e legumes, xa que as dietas ricas nestes alimentos constitúen a mellor maneira de aportar hidratos de carbono complexos e fibra alimentaria. Recoméndase o consumo de pan elaborado con fariñas de menor extracción e o uso da cocción para a preparación culinaria da pataca.
3. Consumo elevado de froitas e hortalizas pola súa achega de antioxidantes e fitoquímicos.
4. Consumo diario de leite e derivados lácteos por ser excelentes fontes de proteínas de alto valor biolóxico, minerais (calcio, fósforo, etc.) e vitaminas.
5. Consumo de carnes moderado. Achegan proteína de alto valor biolóxico e ferro altamente utilizable.
6. Sinxeleza na preparación dos alimentos, para mantener a calidade das materias primas e, polo tanto, o valor nutritivo. A gastronomía atlántica constitúe un patrimonio que se debe conservar e difundir dentro e fóra dos territorios atlánticos.
7. Inxesta abundante de líquidos, fundamentalmente auga. As condicións climatolóxicas e características do solo dos territorios atlánticos permiten obter unhas augas de gran riqueza mineral. Ademais, está recoñecido que un consumo moderado de viño, preferentemente coas comidas, é beneficioso para a saúde pola súa achega en compostos antioxidantes.
8. Realizar actividade física todos os días, xa que é tan importante como comer axeitadamente. A estrutura poboacional atlántica, cun elevado grao de dispersión, xunto co tipo de actividade profesional tradicionalmente atlántica favorece o mantemento dunha actividade cotiá de gran beneficio para a saúde. A natureza atlántica, terrestre e marítima, permite o desenvolvemento de actividades de ocio favorecedoras da actividad física.
Máis información: Fundación Dieta Atlántica