O período da vida no que os ovarios van diminuíndo de forma progresiva a produción de hormonas, principalmente os estróxenos, coñécese como climaterio. Esta etapa da vida desencadéase antes e despois da menopausa.
Aínda que a menopausa é a data na que se produce o cesamento permanente das menstruacións, o uso e o costume consagraron o termo menopausa para designar o período da vida das mulleres unha vez desapareceu a menstruación de forma definitiva.
Estilos de vida durante a menopausa
A menopausa non é unha enfermidade; é unha etapa normal na vida das mulleres na que a adopción de estilos de vida saudables tales como unha alimentación variada e equilibrada, o abandono de hábitos nocivos como o tabaco e a práctica habitual de exercicio físico, contribuirán a mellorar a súa calidade de vida.
Durante a menopausa algunhas mulleres poden aumentar o seu peso, habitualmente entre 2 e 5 quilogramos; é por iso conveniente conseguir un bo control do peso mediante a dieta e a práctica de actividade física de forma habitual.
Complicacións durante a menopausa
Unha das posibles complicacións que poden aparecer tras a menopausa é a osteoporose.
A osteoporose é unha enfermidade dos ósos que consiste na diminución progesiva da densidade e a calidade mineral dos ósos, facéndoos máis fráxiles, aumentando así o risco de fracturas. Este feito prodúcese normalmente coa idade, pero nas mulleres acelérase durante os primeiros anos da menopausa.
O risco de padecer osteoporose non é o mesmo en todas as mulleres, xa que ademais da menopausa existen outros factores que favorecen a súa aparición, tales como unha dieta pobre en calcio, un consumo elevado de café, tabaco, alcol ou a falta de exercicio físico.
Así mesmo coa menopausa pódense producir cambios no metabolismo das graxas, descendendo o chamado “colesterol bo” e favorecendo un aumento nos triglicéridos e o “colesterol malo”. (Aprende algo máis sobre o colesterol)
Recomendacións
Moitas das posibles complicacións que poden xurdir tras a menopausa pódense minimizar adoptando medidas preventivas sinxelas:
- Mantente ben hidratada e consome diariamente alimentos variados e equilibrados en cantidade e calidade.
- Procura manter un peso adecuado.
- Tenta seguir unha dieta rica en calcio e vitamina D. É por iso polo que se recomenda consumir abundantes lácteos desnatados como leite, queixo e iogur. Lembra que para favorecer a absorción do calcio e a súa fixación nos ósos, é importante a exposición moderada ao sol, por exemplo, paseando ao aire libre uns 15 minutos ao día.
- Lembra que o café, o alcol, as bebidas gaseadas ou os alimentos doces e edulcorados, entre outros, dificultan a absorción do calcio.
- Modera a inxesta de graxa. Opta polo aceite de oliva e evita as graxas de orixe animal, a excepción do peixe. O aceite de oliva e a graxa do peixe contribúen a diminuír o risco de padecer algunhas enfermidades cardiovasculares.
- A túa alimentación debe ser rica en ácidos graxos esenciais, presentes no peixe azul pequeno con espiñas (sardiña, bocarte, xarda...) e rica en fibra, presente nos cereais integrais, froitas, verduras, froitos secos, legumes...
- Así mesmo a dieta debe ser rica en minerais (verduras, froitas, peixe...) e en hidratos de carbono de absorción lenta (arroz integral, legumes, verduras, froita...). As froitas e as verduras son beneficiosas xa que achegan antioxidantes naturais e fibra.
- O consumo de alimentos sen sal adoita ser un bo aliado na prevención ou control da hipertensión arterial. Ten presente que a maior parte das conservas, os caldos de carne comerciais ou certos precociñados, adoitan ser alimentos ricos en sal.
- É beneficioso realizar exercicio físico de forma habitual, xa que contribúe a controlar o peso previndo a obesidade, á vez que mellora o ton muscular, o equilibrio e a axilidade. O exercicio físico ha de ser adecuado á túa idade e á túa condición física previa.