Neste artigo encontrarás uns útiles consellos para reducir o teu consumo de sal (e, polo tanto, de sodio). Tamén che mostramos como debes comparar alimentos similares sobre a base das súas etiquetas para unha mellor elección.
Reduce o teu consumo de sal
- O sal contén sodio e o consumo excesivo deste asóciase a presión arterial elevada. Aproximadamente a metade de sal é sodio.
- Ás veces a etiqueta dos alimentos mostra o contido en sodio e non en sal. Busca sempre calquera dos dous ingredientes e fíxate en comparar os alimentos usando a mesma unidade de medida.
- Os froitos secos cómpraos sen sal engadido.
- Diminúe progresivamente o sal que engades na cociña. Proporciona máis sabor aos teus pratos con herbas aromáticas, limón e outros produtos naturais.
Reducir o consumo de sal é vital, por iso é moi importante saber identificar a cantidade de sal que conteñen os alimentos que inxerimos. Ensinámosche cómo facelo a continuación.
Aprende a ler as etiquetas coa información que che proporcionamos:
Busca o contido de sodio (ou de sal) dos alimentos na etiqueta nutricional. Recorda que aproximadamente a metade de sal é sodio. Fíxate nas 2 etiquetas nutricionais seguintes (destácase o sodio) Pertencen a dúas marcas distintas de cereais de almorzo.
Agora compara o contido coa información que che indica a tarxeta amarela inferior. Como podes comprobar, o contido de sodio nos cereais A é “baixo”. O contido de sodio nos cereais B é “alto”. Xa podes facer a túa elección. Recorda que o consumo excesivo de sodio está relacionado coa hipertensión e as enfermidades cardio e cerebrovasculares.
Recorda que: Ás veces a etiqueta amosa o contido de sal e non de sodio. E pode amosar a cantidade en miligramos ou gramos. Non esquezas comparar o contido de nutriente nas mesmas unidades de medida.
Observa o contido de sodio dalgúns alimentos que consumes habitualmente
Fíxate no contido aproximado de sodio (aproximado e medio segundo marcas comerciais) dalgúns alimentos de consumo habitual.
Teríaste imaxinado que os percebes conteñen menos sodio que moitos cereais de almorzo? E que un cubiño de caldo pode conter máis de 1.500mg de sodio?
Recorda que debes consumir menos destes 3 nutrientes, en especial se tes risco para diabete ou enfermidades do corazón:
- Graxas, en particular saturadas.
- Azucres simples engadidos.
- Sal ou sodio.
En resumen, segue estes consellos sempre que poidas:
- Le e compara as etiquetas das diferentes marcas e elixe aquelas "baixas en sal", ou con menos sal, sodio ou cloruro sódico nos seus aditivos que outros produtos similares.
- Limita os caldos en cubiños e saborizantes. Usa os vexetais e as carnes para dar sabor ás sopas.
- Consume menos alimentos en salgadura, embutidos e/ou derivados cárnicos como os produtos de matanza. Prefire como método de conservación, en vez da salgadura, a conxelación para conservar as carnes.
- Se tomas froitos secos, cómpraos sen sal engadida.
- Comproba, na etiqueta nutricional, a cantidade de sodio dos produtos que lles ofreces aos teus fillos. Moitos alimentos habituais na dieta do escolar conteñen sal en exceso.
- Diminúe progresivamente o sal que engades na cociña. Proporciona máis sabor aos teus pratos con herbas aromáticas, limón e outros produtos naturais.
Sabías que?
- O sal non se encontra só nos produtos con sabor "salgado". Algúns con sabor máis doce como os cereais de almorzo e as salsas comerciais (Kétchup, maionesa, salsas preparadas) tamén conteñen sal.
- Ás veces nalgúns produtos que din que non teñen sal, substitúen o cloruro sódico por cloruro potásico.
Por que non probas a revisar os teus armarios e frigorífico en busca de alimentos demasiado salgados?